التجارة الإلكترونية وأزاي تبدأ فيها بكل سهولة ؟
التجارة الإلكترونية وأزاي تبدأ فيها بكل سهولة ؟
التجارة الإلكترونية :
لو هنتكلم عن أشهر الطرق في العالم إنك تعمل فلوس، فالتجارة الإلكترونية أكيد هي اللي هتكسب.
مفيش أي شك إن التجارة دي من أقدم المجالات اللي موجودة من ساعة ما البشرية بدأت.
وسبحان الله الطريقة اللي ربنا سبحانه وتعالى خلى بيها الدنيا بتساعد إن التجارة تنجح.
من الآخر كل حتة بيبقى عندها نقص في حاجة وزيادة في حاجة.
ومن هنا بتقدر إن هي تاخد الحاجة الزيادة وتبعها لحد تاني عنده نقص من الحاجة دي والعكس أصح.
وبالذات بعد ما الإنترنت دخل التجارة الإلكترونية اكتسحت السوق.
أكتر مجال في العالم بيعمل فلوس دلوقتي هو التجارة الإلكترونية وده لأسباب كتير جداً هنتكلم فيها مع بعض .
بس السؤال المهم
إزاي نبدأ في التجارة الإلكترونية ؟
لو عمرك سألت نفسك السؤال ده أو نفسك تبدأ تعمل أونلاين وتشتغل في التجارة الإلكترونية بطريقة كويسة جداً ومضمونة فقرأ المقال ده للآخر.
أهلاً وسهلاً في مقال جديد.
بس قبل ما أقولك إزاي تبدأ في التجارة الإلكترونية !
تعال نتكلم في أهميتها الأول.
ليه بقا مجال التجارة الإلكترونية هو الأهم اللي موجود في العالم كله من ساعة ما الإنترنت دخل؟
والموضوع بكل بساطة حشرحولك في حاجة اسمها The Amazon Effect.
شركة أمازون عملت تغيير كبير جداً في التجارة العالمية لدرجة إنهم عملوا مسمى اسمه The Amazon Effect.
المسمى ده بيشرح التغيير الجذري اللي أمازون عملته في السوق كله.
بكل بساطة من ساعة ما شركة أمازون تأسست لحد النهاردة وسنوياً كمية المحلات اللي بتقفل في العالم كتير جداً وعمالة تزيد.
إحنا بنتكلم على أكتر من 100 ألف محل أتقفل خلال الفترة دي.
والمحلات دي بتقفل علشان أمازون بتخلي المستهلك مش محتاج المحلات دي وأنا ممكن أفتح على طول الموقع واشتري الحاجة Online.
وهي دي ظاهرة الأمازون إفكت وهي خلت إن التجارة اللي موجودة في حياتنا شبهة معدومة أو مبقاش ليها أي لازمة.
ودي حاجة ممكن تحبط حد يشغل في التجارة وعنده محلات ولكن في نفس الوقت ممكن تشجعك إن إنت تبدأ تشتغل في التجارة الإلكترونية وتبدأ تستغل الموضوع ده بطريقة صح .
خلي بالك المقال ده مجرد البداية لإنك تتعلم التجارة الإلكترونية.
اول حاجه هنتكلم فيها عن الأساسيات بتاعت التجارة الإلكترونية.
وإزاي تقدر تبدأ فيها Online ؟
ولكن على قد ما أنا بحاول أسهل لك المحتوى على قد ما أنا عايز أفهمك إن الموضوع أكيد مش سهل وبسيط.
في تريكات كتيرة جداً وفي معلومات كتيرة جداً مستخبية متعرفهاش غير لما أنت تبدأ في المجال.
وأنا بإذن الله مستعد إن أنا أقول لك كل المعلومات دي في سلسلة كاملة وخلينا نبدأ بسم الله
أولً عنصر:
الشكل الأول من المنتج بتاعك: زي ما قلنا في التجارة بيبقى فيه منتج معين ناس محتاجينه في حتة وإنت عندك كتير منه في حتة فأنت بتحاول تبيعه للناس الصح.
قبل ما نتكلم عن الناس تعالى نفكر إيه هو المنتج أساساً.
ببساطة ممكن يكون عندك منتج بتاعك إنت شخصياً بتعرف تصنعه وهتبقى هي دي الحاجة اللي إنت بتبيعها.
الناس اللي بتعمل مجوهرات في البيت أو حتى بيعملوا كراريس أو حتى بيرسموا لوح.
أياً كان المنتج اللي إنت هتقدمه بس الفكرة أن إنت عندك منتج إنت بتصنعه بنفسك أصلًا
هيجي الشكل الثاني للمنتج: وهو أن إنت لقيت مورد عنده منتج معين وإنت شايف إن المنتج ده بجد هيكتسح السوق لو نزل في السوق بالطريقة الصح.
وبكده بتشتري من المورد ده كمية من المنتج وبتبدأ تسوق له صح وتبيعه صح.
الشكل الثالث من المنتجات: هو الدروب شبينج وهنشرحه بالتفصيل في المقال الجاي.
وآخر حاجة هقولها لك قبل ما تقفل فقرة المنتج هي أن لازم المنتج بتاعك يبقى منتج رابح.
مش أي منتج هتختاره هيتباعه وهيجيبلك مبيعات كتيرة لأن في الأغلب ناس كتير جداً هتكون بتبيع نفس المنتج.
فتعلم إزاي تجيب المنتج الرابح.
ثاني عنصر :
بكل بساطة هو المتجر طب أنا خلاص لقيت المنتج بتاعي هتبيع المنتج ده فين بالضبط؟
طبعاً هنا بيجي ميزة من مميزات التجارة الإلكترونية عن التجارة اللي موجودة في المحلات أن انت مش مضطرة تدفع إيجار كبير زي في المحلات دلوقتي.
وفي نفس الوقت الانترنت بيساعدك أن انت توصل لعدد كبير من ناس في وقت قليل قوي مقارنة بالمحل اللي انت فاتحه في مول أو في أي حته.
فخلينا نبص على أنواع المتاجر اللي انت ممكن تبدأ تشتغل فيها.
أول نوع وده النوع لحد لسه معندوش فلوس ومعندوش خلفية كبيرة عن التجارة ولسه بيجرب وهو أن انت تفتح صفحة على انستجرام كمثال.
أنت طبعا ممكن تفتح الصفحة على أي منصة من منصات التواصل الألكتروني ولكن انستجرام بيساعدك أنك تبيع أكتر .
اول حاجه بتفتح صفحة باسم البرند بتاعك بتحط صور وفيديوهات بتبدأ تسوق بيها للمنتج بتاعك.
وكمان انستجرام بيعملك فقرة شوبينج ممكن تحط فيها المنتجات والناس تشتري على طول من خلال انستجرام.
أو حتى يبعتوا لك رسائل يعملوا بيها الأوردر.
ميزة الطريقة دي ان انت بتستغل انستجرام كمنصة ان انت تسوق للمنتج بتاعك وكمان ما بتدفعش اي فلوس تقريبا على اي حاجة. وكمان منصة أوليكس اي تي
( OlXit) تقدر تعرض فيها منتجك مجاناً وكمان تخليها تتصدر محركات البحث بدون اى مجهود غير أنك تعرض منتجك بدون رسوم نهائي.
العنصر الثالث :
وهي الطريقة الاحترافية واللي انا بنصح بيها لو انت عايز تاخد الموضوع ده كشغل او كبزنس حقيقي تعيش عليه.
وهو بكل بساطة ان انت تفتح موقع لنفسك والموقع ده يكون متجر اونلاين.
طبعا لما بتسمع كلمة موقع بتخش في متاهة البرمجة وفي متاهة التصميم وفي متاهات كتير جدا انت مش عارف هتحلها ازاي دا غير أن هي كمان غالية جدا.
وأحب اقولك ان كل ده انتهى من 2001 تقريباً.
والدنيا دلوقتي أتشقلبت بقى في موقع بتساعدك انك تعمل متجر بمجرد ان انت بس تفتح حساب عن الموقع.
من غير اي برمجة ولا اي حاجة انت بتختار الشكل العام بتاع الموقع والموقع بيتعمل لك في وقت حالي.
وكمان التسعيرة بتاعة الحاجات دي بتكون رخيصة جدا ممكن تكون مثلا بـ 25 دولار شهريا.
احنا بنتكلم ان انت مأجر محل في الشهر بـ 25 دولار.
شوف بقى المحل بره بقى يعمل كام دلوقتي وهتفهم الفرق.
طبعا ده ميمنعش انك هتشتري الدومين اللي هو إسم الموقع بتاعك وتقريبا سعره بيبقى 12 دولار وبتدفع له كده فلوس سنوياً رقم قليل برضه.
بس فيه مميزات كتير للموقع
أولًا: ن هو بيدي احترافية للشغل بتاعك وبيحسس العميل ان هو بجد رايح لكيان يشتري منه.
وثانيًا: بيبقى فيه مميزات كتيرة زي ان الناس ممكن تكلمك تبعت لهم ايميلات أوتوماتيك او حتى يعملوا تراكينج للشحن بتاعهم.
وعلشان كده 100% انا بنصح لو انت هتاخد الموضوع ده جد انك تشتغل على موضوع الموقع.
رابع عنصر اساسي:
وهو مهم جدا وهو طريقة التسويق بتاعتك ازاي تقدر تنجح في طريقة تسويقك !
طب احنا دلوقتي جبنا المنتج وحطناه في المتجر وعملنا الموقع والدنيا زي الفل.
ازاي الناس هتعرف ان المتجر ده موجود وأزاي يعرفوا ان المنتج ده بجد حلو ؟
وهنا بكل بساطة بيخش موضوع التسويق والتسويق متقسم لحاجات كتير جدا.
سواء أن أنت بتصور فيديوهات احترافية للمنتج بتاعك وبتبدأ تنزلها سواء بتعمل اعلانات ممولة .
سواء بتجيب انفلوينسرز وتبعتلهم المنتج بتاعك وهم ينزلوا فيديوهات تسويق للمنتج بتاعك فيه طرق كتير جدا.
ولكن في الاغلب هي دي الحاجة اللي بتبدأ تكلفك فلوس شوية في المجال بتاع التجارة
بس طبعاً ارخص حاجة أن أنت تجيب المنتج وتصور الفيديو الاحترافي بنفسك لو بتعرف تصور وتمنتج وتنزل الفيديو وكدا الدنيا هتبقي زي الفل لحد دلوقتي .
ولكن لو هتبعت منتج للانفلوينسرز يأما المنتج هيكون فعلياً غالي فأنت الفلوس اللي بتدهلهم هي قيمة المنتج نفسه وهما عليهم يصوروا فيديو هما بيستخدموه وينزلوه ويعملوا تاج للصفحة بتاعتك.
لاكن لو المنتج ده حاجة خفيفة او مش غالية زي كراسة مثلا فبكل بساطة هتضطر تدفع لهم فلوس علشان يعملوا الاعلان ده.
وطبعا أخر حاجة الاعلانات الممولة من خلال منصة فيسبوك Ads أو جوجل Ads والاعلانات دي لها سيستم كبير جدا لازم تدرسوه كويس قبل ما تبدأ فيه وطبعا بتكون بفلوس.
ولكن برضو لو استغلينا منصة زي تيك توك في موضوع الاعلانات ده ممكن توصل لعدد كبير من ناس من غير ما تدفع فلوس.
بس دا طبعا لو قدرت تعمل ترند واحد صح وتسوق المنتج بطريقة شيك وطريقة صحيحة .
ودي ميزة من مميزات أن إحنا بنستخدم الأنترنت.
وأخر عنصر :
هو اللوجستيكس او اللوجستيكيات.
خلي بالك انت لحد دلوقتي عملت كل حاجة متعلقة بالانترنت وهي دي الحتة السهلة صدقني الموضوع ده ممكن تخلصه في ساعتين أو في ثلاث ساعات.
المنتج بالمتجر بالتصميم بكل حاجة، س لو أنت ربنا وفقك والحمد لله جبت أول أوردر.
يطلعلك مشكلة الأوردر ده
ازاي هتوصله؟
يعني مين اللي هيجي يأخذه من عندك هنا من المخزن أو من بيتك ويروح يوصله لحد العميل ويحصل الفلوس ويرجع الفلوس والقصة دي كلها.
طبعا مش عايزك تخاف هو في حل بسيط للموضوع ده. شركات الشحن عمتًا بدأت تفتح خدمة جديدة لكل الناس اللي بيفتحوا متاجر الالكترونية من بيتهم.
يعني بكل بساطة شركة زي اراميكس مثلا ممكن تتفق معاها جوه مصر انهم يجبولك الأوردر كل ما يجيلك أوردر تسجله عندهم على الموقع يجي لك حد ياخد الأوردر ويوصله تاني يوم او تالت يوم على حسب المحافظة.
طبعا بيبقى فيه مصاريف شحن ولو أنت الأوردرات بتاعتك حجمها قليل فالشحن بيبقى اغلى شوية.
بس طبعا ممكن تحط الشحن ده على العميل مفيش أي مشكلة.
ولو انت عندك سوق خاص أو حد ممكن تديله يومياً ويوصل هو الأوردرات كل يوم فده برضو حل مناسب جدا طالما انت ضامن الراجل.
ولو أرامكس شركة غالية شوية ففيه شركات كتير جدًا في مصر رخيصة ولسه بدأه جديد تساعدك تعمل الموضوع ده بأقل التكاليف.
وآخيرًا:
فبكده لو بصنا على الأربع عناصر دول وعملتهم هتكون بدأت مسيرتك في التجارة الالكترونية.
طبعا بيجي مطبات كتيرة انك ممكن تعمل كل ده وتلاقي أن مفيش حد بيخش على الموقع او الناس بتخش ومش بتعمل أوردرات او الأوردرات قليلة جدا او اي أن كان.
وهنا بقى بتيجي الشطارة في التجارة الالكترونية وهي انك تعرف المشكلة فين.
وهل المنافسين بتوعك شغلهم احسن او منتجاتهم احسن؟
سؤال كمان هل التسويق بتاعك وحش جدا وانت مفروض تبدأ تحسن فيه؟
طب المنتج اللي انت اخترته من الأول فيه مشكلة أو مش احسن منتج مفروض تكون بتبيعه؟
وده يا صديقي أسئلة كتيره جدًا جدا ومهمة في التجارة الالكترونية هتكون أجابتهم إن شاء الله في سلسلة التجارة الالكترونية اللي نعملها هنا على الموقع.
انا عارف المقال ده كان سريع وكان ملخص بس ناس كتيره جدًا معندهاش معرفة بالأساسيات ومش عارفة تبدأ منين.
ومجرد ان انت حطيت الاربع حاجات دول قدامك وبدأت تشتغل فيهم فانت بإذن الله هتعرف تبدأ في المجال
وشكراً لحسن قرائتكم والسلام عليكم ورحمه الله وبركاته.
يمكنك قراءة هذا المقال علي أوليكس اي تي:
شات جي بي تي فور الجديد وكل حاجه محتاج تعرفها عنه .
